गोशाळांना प्रतिपशू १०० रुपये चारा अनुदान द्या

सातारा जिल्हा गोशाळा महासंघाची जिल्हाधिकाऱ्यांकडे मागणी

कुंभारगांव/राजेंद्र पुजारी यांचेकडून

               दुष्काळसदृश परिस्थितीमुळे आगामी आठ महिने गोशाळांसमोर चारा टंचाईचे मोठे संकट उभे राहण्याची शक्यता निर्माण झाली आहे. या पार्श्वभूमीवर गोशाळांमधील पशुधनाचे संगोपन करणे आर्थिकदृष्ट्या कठीण होत असल्याने शासनाने सध्या दिले जाणारे प्रतिपशू ५० रुपयांचे अनुदान वाढवून ते दररोज १०० रुपये करावे, अशी प्रमुख मागणी सातारा जिल्हा गोशाळा महासंघाच्या वतीने जिल्हाधिकारी आणि पशुसंवर्धन विभागाकडे निवेदनाद्वारे करण्यात आली आहे.

            मुख्य कार्यकारी अधिकारी गोशाळा महासंघाचे उल्हास बोराळकर व सर्व शाळा चे संचालक गोशाळा महासंघासोबत उभे राहून संपूर्ण महाराष्ट्रात प्रतिदिन प्रति पशु १००/-रुपये अनुदान मिळावे याकरता महाराष्ट्रातील गोशाळा एकजुटीने एकत्र येऊन भविष्यात दुष्काळावर मात करू असे आंदोलन करून १०१४ नोंदणी प्रत गोशाळां साठी प्रतिदिन १००/-मिळावे अशा मागणीचे निवेदन  क्र.GM/0067/2026 राज्यभरात गोशाळा चालकांनी जिल्हाधिकारी यांना निवेदन  दिले. यावेळी धारेश्वरचे श्री. ष.ब्र.प्र.डॉ.नीलकंठ शिवाचार्य महास्वामी धारेश्वर महाराज उपस्थित होते.

            दुष्काळजन्य परिस्थितीचा सर्वाधिक फटका गोवंश संवर्धनाचे कार्य करणाऱ्या गोशाळांना बसत आहे. सध्या शासनाकडून प्रतिपशू दररोज ५० रुपये अनुदान दिले जाते; मात्र वाढती चारा टंचाई आणि आगामी काळातील संभाव्य परिस्थिती लक्षात घेता हे अनुदान अत्यंत अपुरे आहे. त्यामुळे शासनाने प्रतिपशू दररोज १०० रुपये, म्हणजेच प्रतिमहिना तीन हजार रुपये चारा अनुदान मंजूर करावे, अशी मागणी गोशाळा चालकांनी केली आहे. पशुधनाचे संरक्षण आणि संगोपन ही महत्त्वाची जबाबदारी गोसेवक पार पाडत असल्याने मंजूर अनुदानाची रक्कम विलंब न करता गोशाळांना तातडीने वितरीत करावी, असेही निवेदनात नमूद करण्यात आले आहे.