काळगावचे कविवर्य दिलीप पवार यांना 'आदर्श कविरत्न गौरव पुरस्कार' जाहीर

काळगाव / प्रतिनिधी:

बेडकीहाळ (जि. बेळगाव, कर्नाटक) येथील नामांकित 'कै. बसवंत नागू शिंगाडे सामाजिक सेवाभावी संस्था (ट्रस्ट)' च्या वतीने दिला जाणारा प्रतिष्ठित 'नॅशनल एक्सलन्स गोल्ड स्टार अवॉर्ड - २०२६' अंतर्गत 'राष्ट्रीय प्रेरणा गौरव पुरस्कार' जाहीर झाला आहे. यामध्ये काळगाव येथील प्रख्यात कविवर्य मा. श्री. दिलीप पवार यांची 'आदर्श कविरत्न गौरव पुरस्कारा'साठी अत्यंत मानाने निवड करण्यात आली आहे. संस्थेच्या वतीने समाजाच्या सर्वांगीण विकासासाठी विविध क्षेत्रात उल्लेखनीय व आदर्शवत कार्य करणाऱ्या व्यक्तींना या राष्ट्रीय पुरस्काराने गौरविले जाते. कविवर्य दिलीप पवार यांनी साहित्य आणि काव्य क्षेत्रात केलेल्या सातत्यपूर्ण आणि बहुमूल्य योगदानाची दखल घेऊन संस्थेने यंदाचा हा सर्वोच्च बहुमान त्यांना बहाल केला आहे.

या राष्ट्रीय पुरस्काराचे स्वरूप अत्यंत सन्माननीय असून, यामध्ये कोल्हापुरी फेटा, श्रीफळ, सन्मानचिन्ह, गौरव पत्र आणि मेडल यांचा समावेश आहे. कै. बसवंत नागू शिंगाडे सामाजिक सेवाभावी संस्थेचे संस्थापक अध्यक्ष मा. डॉ. विक्रम बसवंत शिंगाडे यांनी दिलेल्या माहितीनुसार, हा भव्य पुरस्कार वितरण सोहळा प्रमुख पाहुण्यांच्या आणि विविध क्षेत्रातील मान्यवरांच्या उपस्थितीत रविवार, दिनांक २१ जून २०२६ रोजी दुपारी ठीक १:०० वाजता 'रिजेन्टा प्लेस, रायसन्स हॉटेल, ताराबाई पार्क, पंचशीलं हॉटेल जवळ, कोल्हापूर' येथे संपन्न होणार आहे. कविवर्य दिलीप पवार यांना हा राष्ट्रीय स्तरावरील मानाचा पुरस्कार जाहीर झाल्याबद्दल काळगाव व परिसरातील साहित्य, सांस्कृतिक आणि सामाजिक क्षेत्रातून त्यांच्यावर अभिनंदनाचा आणि कौतुकाचा प्रचंड वर्षाव होत आहे.